ក្រុមហ៊ុន Great Wall Motors បាន​បញ្ចេញ​លក់ជាផ្លូវការ​រថយន្ត​ SUV ​ថ្មី​របស់ខ្លួន​ហើយ គឺម៉ូដែល Tank 500 ដែល​ជាគូប្រជែង​ថ្មី​របស់​របស់ Toyota Land Cruiser Prado បន្ទាប់ពី​បង្ហាញ​ចេញ​ក្នុងពិព័រណ៍រថយន្ត​មួយ​កាលពីឆ្នាំមុន។

​រថយន្ត Tank 500 មាន​ប្រវែង ៥០៧០មម ទទឹង ១៩៣៤មម ​កម្ពស់ ១៩០៥មម ប្រវែងពីកង់មុខទៅកង់ក្រោយ ២៨៥០មម។ វាមានជម្រើស ៥កៅអី និង ៧កៅអី។

Tank 500 ប្រើម៉ាស៊ីន​ទាក់បូ V6 ចំណុះ ៣,០លីត្រ ដំណើរការ​ជាមួយ​ប្រព័ន្ធ Mild-Hybrid 48V ផងដែរ ផលិតបានកម្លាំង ៣៤៩សេះ និង​កម្លាំងរមួល ៥០០ញ៉ូតុនម៉ែត្រ ដែល​ជួយ​ឱ្យរថយន្តជាន់ស្ទុះពី ០ ដល់ ១០០គីឡូម៉ែត្រ​ក្នុង១ម៉ោង ប្រើពេល ៧,៣វិនាទី។ កម្រិតស៊ីសាំងគឺ ១០,៧លីត្រ ក្នុង១០០គីឡូម៉ែត្រ។

ផ្នែក​ខាងក្នុង​រថយន្ត​ ក៏មាន​ភាព​ប្រណិតផងដែរ ដោយដៃចង្កូត​ដូចនឹង​រថយន្ត Land Cruiser Prado ហើយ​ប្រព័ន្ធកម្សាន្ត Touchscreen មាន​ទំហំ ១៤,៦អ៊ីញ និង​កុងទ័រឌីជីថល ១២,៣អ៊ីញ។ នៅត្រង់ផ្ទៃតាប្លូ ដៃទ្វារ និងស្នូកកណ្តាល ត្រូវបានបំពាក់ហ្វ័រមីកាឈើ កៅអីពូកស្បែក២ពណ៌ ហើយ​ចង្កឹះលេខបែប premium។

រថយន្ត​ Tank 500 ត្រូវបានដាក់​លក់​ក្នុងតម្លៃចាប់ពី ៣៣៥ ០០០យ័ន ឬប្រមាណជាង ៥២ ០០០ដុល្លារ ដោយមាន​ជម្រើស option ដូចជា Business Edition, Sports Edition, Black Warrior Edition និង Customized version៕

អត្ថបទ៖ សំភី