រថយន្ត Ford Equator Sport 2022 ត្រូវបាន​បន្ថែម​ម៉ូដែល​ពិសេស​ថ្មីមួយទៀត ដែល​កាន់តែមានរូបរាងស្អាតបែបស្ព័រ និងទាក់ទាញ​ជាង​ម៉ូដែលធម្មតានេះ ដើម្បីវាយលុកទីផ្សារ SUV កាន់តែខ្លាំង​ក្នុងប្រទេសចិន។

រូបភាព​រថយន្ត​ថ្មីនេះ ត្រូវបាន​បង្ហោះនៅលើ​វេបសាយ​​របស់​ក្រសួង​ឧស្សាហកម្ម និង​បច្ចេកវិទ្យាព័ត៌មាន​នៃប្រទេសចិន។ ប៉ុន្តែយ៉ាងណា មិន​មានព័ត៌មាន​លម្អិត​ជុំវិញ​វាឡើយ ដោយ​ផ្អែកទៅលើរូបភាព​នោះ គេរំពឹង​ថា រូបរាង​ខាងក្រៅ​ត្រូវបានផ្លាស់ប្តូរ​ច្រើនចំណុច ហើយផ្នែក​ខាងក្នុងវិញ បំពាក់​ប្រព័ន្ធ​កម្សាន្ត Touchscreen ទំហំ ១២អ៊ិញ និង​កុងទ័រឌីជីថល LCD ទំហំ១២អ៊ិញផងដែរ។

ក្រៅពីនេះ ក៏គេ​ឃើញ​មាន​ ដំបូល​ sunroof, ឆ្នាំងសាក​ទូរសព្ទ​ឥតខ្សែ, មុខងារបញ្ជា​ដោយសំឡេង និង​មានកន្លែងដាក់​របស់​ជាច្រើន ពិសេស​នៅផ្នែកកាប៊ីនមុខ។

ដោយ​ឡែក​ចំពោះ​ទំហំម៉ាស៊ីន រថយន្តម៉ូដែល​ពិសេសថ្មីនេះ ដូចម៉ូដែល Ford Equator Sport ធម្មតា ពោលគឺនឹងបន្តប្រើម៉ាស៊ីន​សាំង EcoBoost ស៊ីឡាំង៤ Turbo ចំណុះ ១,៥លីត្រ ផលិតបានកម្លាំង ១៧០សេះ និងកម្លាំង​រមួល ២៦០ញ៉ូតុនម៉ែត្រ។

ចំណែក​ប្រព័ន្ធ​សុវត្ថិភាព​វិញ រថយន្ត SUV នេះ​នឹង​បំពាក់​កញ្ចប់​បច្ចេកវិទ្យា​ Ford Co-Pilot360 ដូច​ម៉ូដែលធម្មតាដែរ រួមមាន ប្រព័ន្ធជួយឱ្យរថយន្ត​រក្សាក្នុងគន្លង, ប្រព័ន្ធ​ឱ្យសញ្ញា​ពេល​រថយន្ត​ងាកចេញពីគន្លង, មុខងារ Blind Spot, ប្រព័ន្ធឱ្យសញ្ញាពេលមានអ្វីមួយនៅពីក្រោយពេល​រ៉ឺយែរចេញចំណត, ប្រព័ន្ធ​ឱ្យ​សញ្ញាអំពី​ឧបសគ្គ​នៅខាងមុខ, ប្រព័ន្ធ​គ្រប់គ្រង​ល្បឿន​ស្វ័យប្រវត្តិ​ធៀបនឹង​រថយន្តខាងមុខ, ប្រព័ន្ធហ្វ្រាំងបន្ទាន់ និងហ្វ្រាំង AEB ព្រមទាំង​ប្រព័ន្ធជំនួយអ្នកបើកបរពេលស្ទះចរាចរណ៍ផងដែរ។

គួរដឹងថា រថយន្ត Ford Equator Sport គឺនឹងមានលក់តែនៅក្នុងប្រទេសចិនប៉ុណ្ណោះ ហើយគ្មានគម្រោង​នាំចេញ​ទៅលក់​នៅក្រៅប្រទេសឡើយ។ រថយន្តនេះ ត្រូវបាន​បង្ហាញ​ចេញតាំងពីខែវិច្ឆិកា ឆ្នាំ២០២១ ប៉ុន្តែ​មិនទាន់​លក់នៅទីផ្សារនៅឡើយ។ តែ​យ៉ាងណា Ford នៅតែសម្រេចចិត្ត​ចេញម៉ូដែលពិសេសថ្មីមួយទៀត ដោយនឹង​អាចប្រកាស​ចេញនៅខែមីនា​ខាងមុខ៕

អត្ថបទ៖ សំភី