រថយន្ត Ford Ranger Raptor ជំនាន់ទី២ ត្រូវបានប្រកាសចេញហើយ ដោយវាមានភាពឆ្លាតវៃ និងធន់រឹងមាំជាងមុន ដែលនឹងក្លាយជាកំពូលរថយន្ត Pickup ក្នុងត្រកូល Ranger ហើយវាក៏នឹងក្លាយជាជម្រើសដ៏ល្អសម្រាប់អ្នកចូលចិត្តបើកបរលើផ្លូវដែលមានឧបសគ្គ។

រូបរាងផ្នែកខាងក្រៅរបស់រថយន្តនេះ គឺមានភាពទាក់ទាញ ជាមួយនឹងប៉ាណាអក្សរ FORD ធំចំកណ្តាលបង្ហាញពីអំណាច និងអនុភាព ចង្កៀងប្រភេទ Matrix LED យ៉ាន់កង់អាលុយមីញ៉ូមបែបស្ព័រទំហំ 17 អ៊ីញ និងសំបកកង់ Off-Road ម៉ាក BFGoodrich។

ផ្នែកខាងក្នុងត្រូវបានយកពណ៍ក្រហមមករំលេចជាថ្នេរដេរ កៅអីបែបស្ព័រ កុងទ័រឌីជីថលថ្មី ទំហំ 12.4 អ៊ីញ អេក្រង់ Touchscreen ទំហំ 12 អ៊ីញ ប្រើប្រាស់ប្រព័ន្ធប្រត្តិបត្តិការ SYNC 4A ជំនាន់ថ្មី និង speaker ម៉ាក B&O ដែលកាលពីមុនមានបំពាក់តែនៅលើ Ford F-150 Raptor តែប៉ុណ្ណោះ។

ចំណុចដែលផ្លាស់ប្តូរធំបំផុតនោះគឺជម្រើសម៉ាស៊ីននៃរថយន្ត ជាលើកដំបូងដែលក្រុមហ៊ុន Ford បានបំពាក់ម៉ាស៊ីន Twin-Turbo 3.0លីត្រ EcoBoost V6 ដែលជាប្រភេទម៉ាស៊ីនសាំងជំនាន់ថ្មី ដែលអាចផលិតកម្លាំងសេះរហូតដល់ទៅ 392សេះ និងកម្លាំងរមួលដល់ទៅ 583ញ៉ូតុនម៉ែត្រ និងជម្រើសមួយទៀតនោះគឺ ម៉ាស៊ីនម៉ាស៊ូត 2.0លីត្រ Bi-Turbo ជំនាន់ថ្មី។

ជាមួយនឹងប្រអប់លេខអេឡិចត្រូនិច 10 វគ្គអូតូជំនាន់ថ្មីដែលអាចប្រើប្រាស់បានទាំងលេខអូតូ និងលេខដៃដែលបង្កើតឡើងយ៉ាងពិសេសសម្រាប់ Ranger ជំនាន់ថ្មី (Next-Gen Ranger) ដំណើរការរួមគ្នាជាមួយនឹងម៉ាស៊ីនជំនាន់ថ្មីធ្វើឲ្យរថយន្ត Ford Ranger Raptor ជំនាន់ថ្មីនេះអាចជំនះបានគ្រប់ស្ថានភាពផ្លូវដូចជា៖ ផ្លូវគ្រួស ភក់ ផុក និងផ្លូវខ្សាច់។

រថយន្ត Ford Ranger Raptor ជំនាន់ថ្មីនេះក៏ត្រូវបានកែប្រែប្រព័ន្ធជើងក្រោមថ្មី ជាក់ស្តែងសាក់ស៊ីទាំងមូលត្រូវបានផ្លាស់ប្តូរថ្មីទាំងស្រុង។ ជាមួយនឹងគ្រោងរថយន្តថ្មី ឃ្លុបក្រោយថ្មី និងស៊ុមរថយន្តថ្មី និងប្រព័ន្ធជើងក្រោមធន់រឹងមាំជាងមុន ដើម្បីប្រាកដថារថយន្ត Ford Ranger Raptor ជំនាន់ថ្មីពិតជាអាចជំនះបានគ្រប់ឧបសគ្គនៃការបើកបរ។

កាន់តែគួរឱ្យចាប់អារម្មណ៍ទៀតនោះ Ford Ranger Raptor ជំនាន់ថ្មីត្រូវបានបំពាក់ដោយបូម FOX 2.5 inch Live Valve Internal Bypass shock ជំនាន់ថ្មី ដែលមានសមត្ថភាពខ្ពស់ជាងមុនទាំងការបើកបរលើផ្លូវធម្មតាដែលវាជួយសម្រួលឲ្យមានភាពផាសុកភាពជាងមុន និងការបើកបរលើផ្លូវមានឧបសគ្គដែលអាចបើកបរទាំងល្បឿនលឿន ឬយឺតដោយគ្មានបញ្ហា។

មិនតែប៉ុណ្ណោះខែលដែកថែបការពារផ្ទៃផ្នែកខាងក្រោមត្រូវបានបង្កើនទំហំធំជាងមុនស្ទើរទ្វេដងលើសរថយន្ត Ford Ranger ជំនាន់ថ្មី និងត្រូវបានប្រើប្រាស់ដែកថែបពិសេសកម្រាស់ 2.3 មីលីម៉ែត្រមកធ្វើ។

ជាលើកដំបូងដែលរថយន្ត Ford Ranger Raptor ប្រើប្រាស់ប្រព័ន្ធគ្រប់គ្រងប៉ុងថ្មី (Advanced Permanent Four-Wheel Drive System) ជាមួយនឹងប្រព័ន្ធចាប់ប៉ុងរថយន្តទាំងកង់មុខ និងកង់ក្រោយដែលសម្រួលពេលជាប់ផុង (Front and Rear Locking Differentials) ។

សម្រាប់ Mode នៃការបើកបរមានរហូតទៅដល់ ៧ ហើយពណ៍នៅលើកុងទ័រ និងប្តូរពណ៍ទៅតាម Mode នៃការបើកបរដែលលោកអ្នកជ្រើសរើសដូចជា៖ ផ្លូវធម្មតា ការបើកបរបែបស្ព័រ ផ្លូវរអិល ផ្លូវថ្ម គ្រួស ផ្លូវខ្សាច់ ផ្លូវភក់ និងផ្លូវឧបសគ្គ។

មុខងារថ្មីមួយដែលទើបតែមានបំពាក់នៅលើរថយន្ត Ford Ranger Raptor ជំនាន់ថ្មីនោះគឺ Trail Control ដែលអនុញ្ញាតឲ្យអ្នកបើកបរកំណត់ល្បឿនថេរមិនលើសពី 32Km/h ក្នុងស្ថានភាពផ្លូវលំបាក និងមានឧបសគ្គដែលវាស្រដៀងទៅនឹងប្រព័ន្ធ Cruise Control ដែរ៕

អត្ថបទ៖ សំភី