ចេញហើយ Toyota RAV4 2023 មិនកែរាង តែកែគ្រឿងក្នុងទំនើបមែនទែន

  • 2022-06-24 03:42:32
  • ចំនួនមតិ 0 | ចំនួនចែករំលែក 0

ចន្លោះមិនឃើញ


ក្រុមហ៊ុន Toyota ប្រចាំ​តំបន់​អឺរ៉ុប បាន​ប្រកាស​ចេញ​ហើយនូវម៉ូដែល​ដ៏ល្បីល្បាញ​គឺ RAV4 ស៊េរីថ្មីឆ្នាំ​២០២៣ ដែល​រូបរាង​វា​រក្សា​ដដែល​ដូចស៊េរីមុនដែរ ប៉ុន្តែបាន​ផ្លាស់ប្តូរ​ផ្នែក​ខាងក្នុង​ពោលគឺ​បំពាក់​បច្ចេកវិទ្យា​កាន់តែទំនើប។

ចំណុច​ដែល​គេចាប់អារម្មណ៍​ខ្លាំង​មកលើ​រថយន្ត​ថ្មីនេះ គឺ​វាបំពាក់​ប្រព័ន្ធ​កម្សាន្ត Touchscreen ទំហំ ១០,៥អ៊ីញ ដែល​យើង​បាន​ឃើញ​រួចមកហើយនៅលើ Corolla និង Corolla Cross។ ​អេក្រង់​នេះ អាចភ្ជាប់ Android Auto និង Apple CarPlay អាចបញ្ជាដោយប្រើសំឡេង (Hey Toyota Voice Assistant) ប្រើប្រព័ន្ធ Cloud-base navigation ដែល​អាច​ដឹង​ពីស្ថានភាព​ចរាចរណ៍ជាក់ស្តែង​នៅ​ផ្លូវ​ខាងមុខ ក៏ដូចជាបង្ហាញ​ពីកន្លែងចំណត​ដែល​នៅជិត​អ្នក​ប្រើប្រាស់​ផងដែរ។ ក្រៅពីនេះ វា​ក៏​មាន​មុខងារ​សម្គាល់​ផ្លាកសញ្ញា​ចរាចរណ៍ និង​សំឡេងរោទ៍អំពីអាកាសធាតុទៀតផង។

ចំពោះ​អេក្រង់ Touchscreen នេះដែរ Toyota ក៏បាន​ផ្តល់​ជាកញ្ចប់​ Smart Service សម្រាប់​បន្ថែម​មុខងារពី​ចម្ងាយ ដូចជា ការចាក់ និងដោះសោ គ្រប់​គ្រងប្រព័ន្ធត្រជាក់ បង្អួច និងភ្លើង​ជាដើម ដោយប្រើប្រាស់​តាមរយៈកម្មវិធី MyT។

ចូល​មកដល់​អេក្រង់​ដ៏សំខាន់​បំផុតមួយទៀតនោះគឺ​ជាកុងទ័រឌីជីថល​ទំហំ ១២,៣អ៊ីញ។ វា​បង្ហាញ​ driving mode ដូច Highlander ដែរ មាន​ដូចជា Casual, Smart, Sport និង Tough។ ក្នុងកុងទ័រនេះ អ្នក​បើកបរ ក៏​អាច​ផ្លាស់ប្តូរ personalize ជាមួយជម្រើស Layout ចំនួន៣ ផ្សេងៗគ្នាផងដែរ។

កាន់តែ​គួរឱ្យកត់សម្គាល់​ទៀតនោះ រថយន្ត RAV4 2023 បានបំពាក់​ប្រព័ន្ធ​សុវត្ថិភាព​កាន់តែទំនើប​ជាងមុន។ ក្នុងនោះ ប្រព័ន្ធព្រមាន​ពីឧបសគ្គ​ខាងមុខ​ដែល​នឹង​អាច​ប៉ះទង្គិច​គ្នា កាន់តែ​មាន​ប្រសិទ្ធភាព​និង​សុវត្ថិភាព។ Toyota ក៏បាន​បន្ថែម​ប្រព័ន្ធ​ជំនួយ​ដៃចង្កូតបន្ទាន់ដែល​អាច​បញ្ចៀសពីការបុកអ្នកថ្មើជើង និង​អ្នក​ជិះកង់​។

ទោះបីជា​រូបរាង​របស់​វា​មិនមានការផ្លាស់ប្តូរ​អ្វី​ក៏ដោយ ប៉ុន្តែ​ចង្កៀង​ LED បាន​អាប់ដេតថ្មីស្អាត​ជាងស៊េរីមុន​បន្តិច និង​បំពាក់​យ៉ាន់កង់​ alloy ថ្មី។ ជាមួយគ្នានោះ Toyota បាន​បន្ថែម​ពណ៌ ស​គជ់ខ្យង platinum white pearl សម្រាប់ option Plug-in Hybrid និង Hybrid។

រថយន្ត​ RAV4 ស៊េរីថ្មីនេះ ប្រើម៉ាស៊ីន Hybrid ​ចំណុះ ២,៥លីត្រ ផលិត​បាន​កម្លាំង ២១៥សេះ (សម្រាប់ប៉ុង១) និង​ ២១៩សេះ (សម្រាប់ប៉ុង២)។ បើវា​ប្រើ Plug-in Hybrid គឺ​ផលិតបាន​កម្លាំង ៣០២សេះ ដែលដំណើរការ​ជាមួយម៉ូទ័រ​អគ្គិសនី និងប៉ុង២។ ចំណែក​ម៉ាស៊ីនសាំង​វិញ ទំនង​ជាមិនបំពាក់​នៅលើវាទេ។

រថយន្ត Toyota RAV4 2023 នឹង​ត្រូវ​ផលិត​ក្នុងអំឡុងត្រីមាសទី៣ នៃឆ្នាំ​២០២២ខាងមុខនេះ ហើយ​តម្លៃ​របស់​វា​ក៏មិនទាន់​ប្រកាស​ចេញនៅឡើយដែរ៕

អត្ថបទ៖ សំភី