ក្រុមហ៊ុន Changan-Ford បាន​ប្រកាស​ចេញ​ជាផ្លូវការ​នូវរថយន្ត​ថ្មីគឺម៉ូដែល Mondeo ST-Line នៅក្នុងប្រទេសចិន កាលពីថ្ងៃទី២៤ ខែកុម្ភៈ ដែលវាមានរូបរាងដ៏ស្អាតទំនើប។

រថយន្ត​នេះ ត្រូវបានអភិវឌ្ឍឡើង​លើ​គ្រោងឆ្អឹង​តែមួយ​ដូច Ford Evos និង Lincoln Zephyr ដែរ។ វា​មានភាព​ទាក់ទាញ​បំផុត​ដោយ ប៉ាណាថ្មីរបស់វា ហើយ​រន្ធបឺតខ្យល់​ស្ថិតនៅផ្នែកខាងក្រោមជាប់កាង។

កាន់តែគួរឱ្យចាប់អារម្មណ៍​បំផុត​ទៀតនោះ គឺ​ផ្នែក​ខាងក្នុង​របស់​រថយន្ត​នេះ ដែល​ផុសឡើង​ដោយ​បន្ទះ​អេក្រង់​ពេញផ្ទៃតាប្លូ ទំហំ ៤៣អីញ ក្នុងនោះ​វាជាអេក្រង់កុងទ័រ​ឌីជីថល​ទំហំ ១២,៣អ៊ីញ និង​ប្រព័ន្ធកម្សាន្ត Touchscreen ទំហំ ២៧អ៊ីញ ​បំពាក់​បច្ចេកវិទ្យា SYNC+ 2.0 ដែលមានកម្រិត​បង្ហាញ 4K។

ក្រៅពីនេះ វាបំពាក់​អំពូលក្នុងរថយន្ត Ambient Lighting, កៅអីបែបស្ព័រ និងដំបូល sunroof បំពាក់​ប្រព័ន្ធជំនួយ​បើកបរ Ford Co-Pilot 360 និង​មាន​មុខងារ Voice Recognition, Gesture Control និង Facial Recognition។

ទោះ​ជាការឌីហ្សាញ​បែបស្ព័រថ្មី ប៉ុន្តែ​រថយន្ត Mondeo ST-Line នៅតែ​បន្ត​ប្រើម៉ាស៊ីនទាក់បូ EcoBoost ស៊ីឡាំង៤ ចំណុះ ២,០លីត្រ ផលិតបានកម្លាំង ២៣៨សេះ និងកម្លាំងរមួល ៣៧៦ញ៉ូតុនម៉ែត្រ ជាមួយ​នឹង​ប្រអប់លេខអូតូ៨វគ្គ រត់ប៉ុងមុខ។

យ៉ាងណាក៏ដោយ ចំពោះ​តម្លៃ​របស់ថយន្ត Mondeo ST-Line ស៊េរីថ្មីនេះ មិនត្រូវបាន​ប្រកាស​ឱ្យដឹងឡើយ៕

អត្ថបទ៖ សំភី