ក្រុមហ៊ុន Ssangyong បាន​បញ្ចេញ​រថយន្ត SUV ធុនកណ្តាល​ថ្មី ម៉ូដែល Torres ក្នុងប្រទេស​កូរ៉េខាងត្បូង មក​ជាមួយ​រូបរាង​បែបថ្មីទំនើប​ទាន់សម័យ ដែល​គេ​អះអាងថា វា​ច្របាច់​ប្រចូល style ពី​ប្រេន​រថយន្ត​ល្បីៗ។

ផ្នែកខាងមុខ​រថយន្ត​ ត្រង់ប៉ាណា​​ឌីហ្សាញ​ដូចជា​ឡាន Jeep មាន​ដែក​បញ្ឈរតូចៗចំនួន៦​តម្រៀបគ្នា ចង្កៀង​រាងស្លីម​ជាប្រភេទ LED រន្ធបឺតខ្យល់​ធំ និង​មានកាង​ជាប្រភេទ​អាលុយមីញ៉ូម។ បើនៅផ្នែក​ចំហៀងវិញ យើងឃើញ​មាន​ប្រអប់​មួយ​ ដូច Land Rover Defender ហើយ​ផ្នែក​ខាងក្រោយវិញ ក៏មានបំពាក់​ដុំពកធំមួយ​ការពារ​នៅទ្វារក្រោយ ចង្កៀង​ក្រោយ​នេះ​ក៏ជាប្រភេទ LED ស្រដៀង​នឹង​ Ford Explorer ដែរគ្រាន់តែចង្កៀង​នេះ​វែងជាងបន្តិចមាន២កំណាត់ និង​មានកាងការពារផងដែរ។

ចូល​មកផ្នែក​ខាងក្នុង​វិញ​​ រថយន្ត Torres បំពាក់​ប្រព័ន្ធកម្សាន្ត Touchscreen ទំហំ ១២,៣អ៊ីញ និង​មាន​អេក្រង់ ៨អ៊ីញ​មួយ​ទៀត​សម្រាប់​បញ្ជាលើ​ប្រព័ន្ធត្រជាក់។ ចង្កូត​វា​ហាក់ប្លែក​ខុសពីគេ​ដោយ​មានកាំ៤ ក្នុងនោះភ្ជាប់គ្នា ២កាំៗ និង​មាន​ប៊ូតុង​សម្រាប់​ចុចបញ្ជា។ អ្វីដែល​កាន់តែពិសេសនោះ គឺ​តាបឡូ ទ្វារ និង​ប្រអប់​កណ្តាល សុទ្ធតែស្រោប​ដោយស្បែក។ ក្រៅពីនេះ វា​បំពាក់​ភ្លើង ambient light, Speaker ៦គ្រាប់, រន្ធ USB ៤ និង​ពោងសុវត្ថិភាព ៧គ្រាប់។

តែយ៉ាងណា ចំពោះ​កម្លាំងម៉ាស៊ីនវិញ មិនត្រូវបានទម្លាយឱ្យដឹងឡើយ ដោយ Ssangyong គ្រាន់តែ​បញ្ជាក់​ថា វាប្រើម៉ាស៊ីន T-GDI ដែលគេប៉ាន់ស្មានថា​វាអាចនឹង​ប្រើ​ម៉ាស៊ីន​សាំង​ទាក់បូ ១,៥លីត្រ ដូច​រថយន្ត Korando ជាមួយនឹង​ប្រអប់លេខអូតូ ៦វគ្គ រត់ប៉ុងមុខ។ វាក៏មាន​ជម្រើសប្រើប៉ុង២ផងដែរ សម្រាប់​ option OFF-Road។

Ssangyong បាន​ដាក់ឱ្យកម្មង់​ទិញ​រថយន្ត Torres នេះហើយ ក្នុងប្រទេសកូរ៉េខាងត្បូង ដែលមានតម្លៃជាង ២៦លានវ៉ុន ឬ ២ម៉ឺនដុល្លារស្តើង ចេញពី​រោងចក្រ។ បើ​តាម​របាយការណ៍មួយចំនួន អះអាងថា វា​ក៏នឹងមាន Version ប្រើអគ្គិសនីសុទ្ធផងដែរ ក្នុងឆ្នាំ​២០២៣៕

អត្ថបទ៖ សំភី