អេម! នេះជាឡានថ្មីទើបចេញ បើជិះ១ថ្ងៃត្រឹម ៧០គ.មអី មិនអស់លុយសូម្បីតែ១រៀល

2022-06-13 03:33:02
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅទីបំផុត ក្រុមហ៊ុន Lightyear បានទម្លាយលម្អិតនូវរថយន្តមិនប្រើសាំងរបស់ខ្លួន ពោលគឺជារថយន្តអគ្គិសនីផង និងប្រើថាមពលសូឡាផង ដែលជាម៉ូដែល Lightyear 0។

មើលរូបរាងរបស់វាយើងឃើញថា ការឌីហ្សាញរថយន្តនេះគឺជារាងបែបអនាគតតែម្តងពិតជាទំនើបមែនទែន។ ដំបូលរបស់វាគឺជាបន្ទះសូឡាសុទ្ធតែម្តង ដើម្បីស្រូបពន្លឺព្រះអាទិត្យដើម្បីបង្កើតថាមពលសម្រាប់ដំណើរការរថយន្ត។ ទម្ងន់របស់វាស្រាលត្រឹមតែ ១៥៧៥គីឡូក្រាម និងមានប្រវែងជាង ៥ម៉ែត្រ។

រថយន្តនេះគឺអំណោយផលខ្ពស់សម្រាប់ប្រទេសក្តៅ។ នៅក្នុងរដូវក្តៅ បន្ទះសូឡាដែលបំពាក់លើរថយន្ត នឹងស្រូបពន្លឺបានកាន់តែច្រើន ជួយឱ្យបង្កើនចម្ងាយឱ្យរថយន្តបាន ៧០គីឡូម៉ែត្រក្នុងមួយថ្ងៃ ឬ ១១ ០០០គីឡូម៉ែត្រក្នុង១ឆ្នាំ។ ដូច្នេះបើអ្នកប្រើប្រាស់ ធ្វើដំណើរត្រឹមចម្ងាយប៉ុណ្ណឹងៗក្នុង១ថ្ងៃ គឺមិនចាំបាច់ត្រូវសាកភ្លើងថែមនោះទេ ឬនិយាយសាមញ្ញថា មិនអស់លុយសូម្បីតែ១រៀល។

តែយ៉ាងណា បើមានតម្រូវការទៅឆ្ងាយៗ ក៏មិនថ្វីដែរ ព្រោះពេលសាកភ្លើងពេញម្តងអាចធ្វើដំណើរបានដល់ចម្ងាយ ៦២៥គីឡូម៉ែត្រ។ វាបំពាក់អាគុយទំហំ ៦០គីឡូវ៉ាត់ម៉ោង ជាមួយម៉ូទ័រភ្លើង៤ ផលិតបានកម្លាំង ១៧៤សេះ និងកម្លាំងរមួល ១៧២០ញ៉ូតុនម៉ែត្រ ជាន់ស្ទុះពីល្បឿន ០ ទៅ ១០០គីឡូម៉ែត្រ/ម៉ោង ប្រើពេល ១០វិនាទី និងអាចជាន់កប់ដល់ល្បឿនអតិបរមា ១៦០គីឡូម៉ែត្រ/ម៉ោង។

ចំពោះល្បឿននៃការសាកភ្លើងគឺមានច្រើនជម្រើស ក្នុងនោះ បើប្រើដុំសាកលឿន គឺសាកមួយម៉ោង អាចបើកបានចម្ងាយ ៥២០គីឡូម៉ែត្រ, បើសាកនៅស្ថានីយសាធារណៈ គឺសាកមួយម៉ោងបើកបាន ២០០គីឡូម៉ែត្រ និងសាកនៅផ្ទះ មួយម៉ោងបើកបានចម្ងាយ ៣២គីឡូម៉ែត្រ។

ចូលមកផ្នែកខាងក្នុងវិញ Lightyear 0 បំពាក់អេក្រង់ Touchscreen ទំហំ ១០,១អ៊ីញ ដំណើរការដោយប្រព័ន្ធប្រតិបត្តិការ Android ដោយអាចភ្ជាប់ជាមួយ Android Auto និង Apple CarPlay។