ដឹងហើយថា ឡានអគ្គិសនីសន្សំសំចៃ តែដោយសារចំណុច៤នេះ ទើបគេនៅរារែកចិត្ត
- 2022-06-10 08:19:09
- ចំនួនមតិ 0 | ចំនួនចែករំលែក 0
ដឹងហើយថា ឡានអគ្គិសនីសន្សំសំចៃ តែដោយសារចំណុច៤នេះ ទើបគេនៅរារែកចិត្ត
ចន្លោះមិនឃើញ
តម្លៃប្រេង ការបំពុលបរិស្ថាន ច្បាប់ និងការលើកទឹកចិត្តពីរដ្ឋ សុទ្ធតែជាកត្តាសំខាន់ៗដែលជំរុញដល់ការប្រើប្រាស់រថយន្តអគ្គិសនីនាពេលបច្ចុប្បន្ន និងអនាគត។ ប៉ុន្តែបើយើងមើលជារួមក្នុងពិភពលោកវិញ ឃើញការប្រើប្រាស់រថយន្តប្រភេទនេះ នៅមានចំនួនតិចតួចនៅឡើយ។
តោះឥឡូវយើងមកដឹងចំណុចខ្លាំង និងចំណុចខ្សោយនៃរថយន្តអគ្គិសនីនាពេលបច្ចុប្បន្ន
ចំណុចខ្លាំង
១. ជួយដល់ការសន្សំសំចៃពីការប្រើប្រាស់ប្រេង និងការជួសជុល
យើងឃើញជាក់ស្តែងហើយថា តម្លៃប្រេងកំពុងឡើងថ្លៃ ចំណែកឯការសាកភ្លើងគឺមានតម្លៃថោកជាង។ ម្យ៉ាងវិញទៀត គ្រឿងបង្គុំរបស់រថយន្តអគ្គិសនី មិនមានច្រើនដូចរថយន្តប្រើប្រេងសាំង ឬម៉ាស៊ូតឡើយ ដែលធ្វើឱ្យវាមិនងាយឆាប់ខូច ឬត្រូវថែទាំជាប្រចាំអស់លុយច្រើនឡើយ ដូចជាការប្តូរប្រេងម៉ាស៊ីនជាដើម។
២. សំឡេងស្ងាត់
ដោយសារវាមិនប្រើគ្រឿងមេកានិច និងមិនប្រើប្រេងសាំង ដូច្នេះពេលបញ្ឆេះរថយន្ត គឺវាមិនដុតប្រេងសាំងនៅក្នុងម៉ាស៊ីន ដែលធ្វើឱ្យលាន់សំឡេងនោះឡើយ។
៣. មិនបំពុលបរិស្ថាន
វាមិនបញ្ចេញផ្សែងពុលចូលទៅក្នុងបរិយាកាសឡើយ។
៤. មិនចាំបាច់ត្រូវបើករថយន្តទៅចាក់សាំងនៅហ្គារ៉ាស
អ្នកដែលប្រើរថយន្តអគ្គិសនី អាចសាកនៅផ្ទះពួកគេបាន ឬអាចសាកនៅគ្រប់ទីកន្លែងដែលគ្រាន់តែមានដុំសាក ឬចំណតសាកភ្លើង។
ចំណុចខ្សោយ
១.តម្លៃថ្លៃ
រថយន្តអគ្គិសនីគឺមានតម្លៃថ្លៃ ព្រោះតែដំណើរការផលិត គឺត្រូវប្រើបច្ចេកវិទ្យាថ្មីទំនើប និងអ្នកបច្ចេកទេសខ្ពស់ ដែលត្រូវចំណាយច្រើនក្នុងការផលិត ដូច្នេះវាក៏ធ្វើឱ្យតម្លៃកើនឡើងទៅតាមហ្នឹងដែរ។
២. ចម្ងាយនៃការបើកបរ
សម្រាប់ប្រទេសតូចៗ ប្រហែលមិនសូវចោទជាបញ្ហាទេ តែសម្រាប់ប្រទេសធំៗ ដែលទាមទារការធ្វើដំណើរឆ្ងាយពីកន្លែងមួយទៅកន្លែងមួយ គឺពិបាកបន្តិចហើយ ដោយសារតែរថយន្តអគ្គិសនីបច្ចុប្បន្នភាគច្រើន ពេលសាកពេញ ធ្វើដំណើរបានចម្ងាយត្រឹម ២០០ ទៅ ៣០០ ឬ ៤០០គីឡូម៉ែត្រ ដូច្នេះត្រូវទាមទារការសាកភ្លើងជាប្រចាំ។
៣. ចំណតសាកភ្លើង
សម្រាប់ប្រទេសជឿនលឿនខ្លះ គឺមានចំណតសាកភ្លើងច្រើនហើយ និងអាចសាកលឿនបានទៀតផង អាចបំពេញតម្រូវការបាន ប៉ុន្តែប្រទេសអភិវឌ្ឍន៍តិចតួច មានដោយកន្លែងមួយៗប៉ុណ្ណោះ ហើយនេះគឺជាបញ្ហាដ៏ធំបំផុតមួយ ក្នុងការឈានទៅរកការប្រើរថយន្តអគ្គិសនី។
៤. មិនសូវមានជម្រើសច្រើន
បច្ចុប្បន្ន ក្រុមហ៊ុនរថយន្ត ផលិតប្រភេទអគ្គិសនីតែមួយ ឬពីរម៉ូដែលប៉ុណ្ណោះ ពោលគឺពួកគេនៅតែបន្តផ្តោតខ្លាំងលើការផលិតរថយន្តប្រើប្រេងសាំង ឬ Hybrid ដូច្នេះហើយអ្នកដែលចង់ទិញរថយន្តអគ្គិសនី មិនមានជម្រើសច្រើនឡើយ៕