ជិះឡានម៉ូតូរហូតដល់អស់សាំងរលីង អាចមានគ្រោះធំដល់ម៉ាស៊ីន

2022-04-15 08:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកខ្លះព្រោះតែខ្ជិលចង់ចំណេញលុយរឿងងាកចាក់សាំងៗ សុខចិត្តជិះឡានម៉ូតូរហូតអស់សាំង ហើយសម្រាប់អ្នកជិះម៉ូតូវិញរហូតដល់បណ្តើរតាមផ្លូវទៀតក៏មាន។ បើតាមម្ចាស់ហ្គារ៉ាស់មួយកន្លែង បានបញ្ជាក់ថា ឡានម៉ូតូដែលជិះរហូតដល់អស់សាំងពេក នាំឱ្យមានបញ្ហាខូចម៉ាស៊ីន ត្រូវទៅជាងអស់លុយអត់អំពើ។

កាលណាធុងសាំងឡានឬម៉ូតូអស់សាំងរលីង វានាំឱ្យកើតមានធូលីឬកំណកកករស្ទះប្រព័ន្ធបូមសាំង ឬប៊ិចសាំង រហូតធ្វើឱ្យខូច។ នៅពេលប៊ិចសាំងមានបញ្ហា ម្ចាស់យានជំនិះត្រូវខាតប្រាក់កាសដោយសារការជួសជុលចំពោះករណី តែបើប៊ិចសាំងខូច ត្រូវដូរថ្មី ដោយប៊ិចសាំងឡានមួយធម្មតាថ្លៃ ៤៥ដុល្លារ និងអាចថ្លៃដល់ ១០០ដុល្លារទៅតាមប្រភេទរថយន្ត។

ក្រៅពីធ្វើឱ្យខូចប៊ិចសាំង ជាតិទឹកក្នុងសាំងដែលនៅសេសសល់នឹងប៉ះពាល់ដល់ឌុយស៊ីម៉ាំងឬសំបុកឃ្មុំ។ បើឌុយស៊ីមាំងឬសំបុកឃ្មុំខូចត្រូវដូរថ្មី ត្រូវចំណាយប្រហែលខ្ទង់ ១៣០ដុល្លារ។

ចំពោះម៉ូតូ អាចនឹងជួបគ្រោះថ្នាក់ផ្សេងៗ ពេលត្រូវអស់សាំងលើដងផ្លូវកកស្ទះពាក់កណ្តាលទី ក្រោយមុខងារអ៊ែរម៉ូតូអស់ដំណើរការ។ យល់ល្អអ្នកបើកបរត្រូវរកកន្លែងចាក់សាំងឱ្យបានលឿន ខណៈទ្រនិចកុងទ័រឈានដល់ចំណុចក្រហម កុំដល់ថ្នាក់ជិះរហូតបើកអ៊ែរ។

ចំណែករថយន្តវិញពេលជិតអស់សាំង អ្នកជំនាញណែនាំថា គួរតែបិទប្រព័ន្ធម៉ាស៊ីនត្រជាក់ បើជិះនៅផ្លូវស្ទះ ព្រោះយ៉ាងហោចណាស់វាជួយសន្សំសំចៃសាំង អាចឱ្យរថយន្តរត់ទៅមុខបានមួយស្របក់ដែរ៕

អត្ថបទ៖ សំភី