ក្រុមហ៊ុន Honda បាន​បញ្ចេញ​ម៉ូតូអូតូ​ខា្នតធំ​ថ្មី គឺ ADV350 ឆ្នាំ​២០២២ ដែល​មាន​រូបរាង​ទាក់ទាញ​ខ្លាំង​មែនទែន បំពាក់​បច្ចេកវិទ្យា​ទំនើបៗ និងម៉ាស៊ីនថ្មី ព្រមទាំង​ផ្តល់​បទពិសោធន៍​ដល់​ការបើកបរ​បែបថ្មី។

ម៉ូតូ Honda ADV350 ស៊េរីថ្មី​នេះ បំពាក់​ចង្កៀង LED មាន​កញ្ចក់​បាំងខ្យល់ មាន​ដែក​សងខាងម៉ូតូ​សម្រាប់កាន់ កុងទ័រ​ឌីជីថល រន្ធសាកថ្មទូរសព្ទ USB ហើយ​អ្វីដែលគួរឱ្យចាប់អារម្មណ៍បំផុត គឺ​ឃ្លុបក្រោមកែប អាចផ្ទុកបានចំណុះ ៤៨លីត្រ ឬអាច​ដាក់​មួកសុវត្ថិភាព​បាន​ដល់២ឯណោះ។

មិន​ខុសពី​ម៉ូតូ Honda ឆ្នាំ​២០២២ដទៃទៀត​នោះ​ទេ ADV350 ក៏ប្រើ​ម៉ាស៊ីន​ថ្មី eSP+ ផងដែរ ដែលមាន​ចំណុះ ៣៣០​សេសេ។ ចំណែក​បច្ចេកវិទ្យាវិញ គឺសុទ្ធតែលំដាប់ហើយ​ដោយ​បំពាក់​ប្រព័ន្ធ​បញ្ជា​សំឡេង​តាម​ស្មាតហ្វូន ដោយ​ប្រើប្រាស់​មុខងារ​ចំនួន៤ ដូចជាការខលទូរសព្ទចេញចូល កម្មវិធីចាក់​តន្រ្តី ផែនទី និង​ការផ្ញើ និងទទួលសារ។ វាបំពាក់​ប្រព័ន្ធហ្វ្រាំង ABS មុខក្រោយ សោ Smart Key បញ្ឆេះ​ពីចម្ងាយ និង​ប្រព័ន្ធការពារ​ពីការលួច។

Honda បាន​ដាក់​លក់​ម៉ូតូនេះ ក្នុងប្រទេសថៃ ដែលមានតម្លៃ​ជាង ១៨ម៉ឺនបាត ឬជាង ៥ពាន់ដុល្លារអាមេរិក ដោយ​មាន​២ប្រភេទ គឺ RoadSyne និង Standard និង​មាន​ជម្រើសពណ៌ ប្រផេះ ទឹកប្រាក់ ក្រហម និងខ្មៅ៕

អត្ថបទ៖ សំភី