ឡានវ៉ែន Toyota Voxy ចេញលក់ហើយ តម្លៃជាង ៣៨ ០០០ដុល្លារ

2022-02-21 09:34:57
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តវ៉ែនថ្មីរបស់ Toyota គឺម៉ូដែល Voxy ឆ្នាំ២០២២ ត្រូវបានដាក់លក់ជាផ្លូវការហើយក្នុងប្រទេសឥណ្ឌូណេស៊ី បន្ទាប់ពីប្រទេសជប៉ុន។

ដោយសារតែឥណ្ឌូណេស៊ីជាទីផ្សារដ៏ធំមួយសម្រាប់ពពួកឡានវ៉ែន ដូច្នេះទើបក្រុមហ៊ុន Toyota ប្រចាំឥណ្ឌូណេស៊ី បានសម្រេចនាំយកវា ប៉ុន្តែជ្រើសរើសយកតែម៉ូដែលប្រើម៉ាស៊ីន 2.0 ផលិតបានកម្លាំង ១៦០សេះ ជាមួយនឹងប្រអប់លេខ CVT ប៉ុណ្ណោះ។

រថយន្តនេះ បំពាក់ចង្កៀងមុខ LED ដល់ទៅ២ ដោយផ្នែកខាងមុខរំលេចស្ទើរតែទាំងអស់ដោយប៉ាណា ហើយចង្កៀងស្តុបក្រោយជាប្រភេទ LED ដែលលាតសន្ធឹងពីម្ខាងទៅម្ខាង។ ទ្វារខាងក្រោយ បិទបើកដោយគ្រាន់តែប្រើជើងគ្រវី ហើយវាក៏មានក្តារ Welcab សម្រាប់រុញកៅអីជនពិការឡើងចុះរថយន្តផងដែរ។

ផ្នែកខាងក្នុងនៃរថយន្តទាំងពីរ គឺមានកៅអី៣ជួរ ឬស្មើនឹង៧កៅអី ដែលអាចបត់បានដើម្បីដាក់ឥវ៉ាន់ ឬសម្រាប់គេងសណ្តូកជើង។ ដៃចង្កូតមានប៊ូតុងសម្រាប់ចុចបញ្ជា កុងទ័រឌីជីថល ៧អ៊ីញ ជាប្រភេទ TFT LCD មានអេក្រង់ Head-up display ហើយមានប្រព័ន្ធកម្សាន្ត Touchscreen ទំហំ ៩អ៊ីញ និងអេក្រង់ ១១,៦អ៊ីញ សម្រាប់អ្នកដំណើរខាងក្រោយ ពិសេសមានរន្ធសម្រាប់ដាក់កែវទឹក ត្រូវបានឌីហ្សាញយ៉ាងស្រស់ស្អាតនៅផ្ទៃតាប្លូ។ វាក៏មានប្រព័ន្ធសំឡេងឮច្បាស់ខ្លាំង ដែលធ្វើឱ្យអ្នកដំណើរកាន់តែជក់ចិត្ត។

រថយន្ត Voxy បំពាក់ប្រព័ន្ធសុវត្ថិភាព Toyota Safety Sense 3.0 រួមមានដូចជា ប្រព័ន្ធឱ្យដំណឹងមុនពេលប៉ះទង្គិចគ្នា, ប្រព័ន្ធជួយឱ្យរថយន្តរក្សាក្នុងគន្លង, ប្រព័ន្ធគ្រប់គ្រងល្បឿនស្វ័យប្រវត្តិធៀបនឹងរថយន្តខាងមុខ, ប្រព័ន្ធភ្លើងហ្វាស្វ័យប្រវត្តិ និងប្រព័ន្ធឱ្យសញ្ញាពេលមានរថយន្តខាងក្រោយចង់វ៉ាជែង។